حدوتة شجرة شعر البنت

حدوتة شجرة شعر البنت

كان ياما كان يا سعد يا إكرام ما يحلى الكلام إلا بذكر النبى عليه الصلاة والسلام.

كان فى شجرة أسمها شعر البنت والشجرة ديه كانت كبيرة وفروعها نازلة وطويلة زى شعر البنت، وكان فيها طيور وعصافير كتير ساكنين فى فروع الشجرة، والشجرة كانت بتحب صوت العصافير قوى. وفى يوم من الأيام جه صياد ببندقيته وقعد يصطاد فى العصافير والطيور وكل الطيور هربت من الشجرة. الشجرة زعلت قوى عشان الطيور سابوها وهى بقت لوحدها وفضلت الشجرة حزينة قوى.

وفى يوم من الايام جاء هدهد شكله جميل قوى وبنى عش فى الشجرة ووضع بيض فى العش والبيض طلع طيور هدهد صغيرة وشكلها جميل قوى. وشجرة شعر البنت كانت فرحانة قوى بالطيور الصغير وكان الهدهد الكبير يخرج كل يوم يجيب الأكل لأولاده الصغار وفى يوم جاء صقر كبير وعاوز يأكل الصغار ، خافت الصغار والشجرة زعلت وكانت خايفة على الصغار وفكرت وقالت أعمل إيه يارب عشان أمشى الصقر ده، ففكرت أنها تحرك فروعها لفوق وتنزلهم لتحت بسرعه عشان الصقر ميعرفشى يشوف عش الهدهد وفعلا الصقر عينيه زغللت من فروع الشجرة وحركتها السريعة ومشى بعيد فرحت الصغار قوى . ولما رجع الهدهد حكى له الصغار على الشجرة وإزاى أنقذتهم من الصقر. أستغرب الهدهد للحكاية وحكى لأصحابه الطيور فكل الطيور حبت الشجرة قوى وقررت أنها تعيش فى شجرة شعر البنت وفعلا الشجرة رجعت أتملئت بالطيور والعصافير تانى والشجرة كانت مبسوطه بصوت الطيور والعصافير وحست أن ليها أصحاب كتير بيحبوها وهى بتحبهم .

وتوتة توتة خلصت الحدوتة حلوة ولا ملتوته

القصة حلوة والرسمة أحلى

» حدوتة الشاطر حسن
» شجرة بونسيانا - بالماوس