على سلامة - على باب السفارة

على باب السفاره

على باب سفارة كندا
لمحت ابليس و ف ايده استماره
بقول له على فين
قاللي بص
يا هجره يا اعاره
يا عم زهقت كفرت
الاقيش معاك سيجاره
انا انتهيت خلاص
لا نافع وسواس ولا خناس
ولا ليا عيش وسط الناس
دي عالم مجرمين
عندكوا فائض ف الفساد
في كل البلاد
ومش محتاجين شياطين
مليش عيش ف البلد دي
بقالي سنين عاطل
و انتوا بتعرفوا
تقلبوا الحق باطل
و تسلكوا القاتل
و تمشوا ف جنازة المقتول
ومفيش مشاكل
يا عم ده انا بقيت أوسوس بالمقلوب
و أقول للحرامي كفايه بقى توب
انت هاتعمل كل الذنوب لوحدك
و أنا ابليس
أشتغل واعظ
ولا كمساري ف اتوبيس
يا عم ده انا زمان
كنت استنى حد ينسى
يسمي
وهو بياكل لقمته
دلوقتي كل اكلكم ملوث
و بصراحه الواحد خايف على صحته
ده مفيش ضمير اساسا
عشان اموته
و كل واحد بمزاجه
خربانه ذمته
يا عم ده كل حاجه اتسرقت
وكده الاجيال الجديده
م الحراميه اتظلمت
يا راجل ده من كتر ما لطشت معايا
خرجت ف مظاهره
مع الناس اللي بتقول كفايه
و برضه مفيش فايده

]ايه الشعر الجميل ده منغير كدب انتى هايله ومتفوقه فى الاشياء الجميله فى الفن والاشعار/

احمد عزام كتب:: ]ايه الشعر الجميل ده منغير كدب انتى هايله ومتفوقه فى الاشياء الجميله فى الفن والاشعار/

أشكرك على المشاركة وكلامك الرائع
كلك ذوق يا أحمد
نورتنى والله