سعاد
عضو نشيط
عدد الرسائل : 310
عدد الساعات التى تقديها على النت تقريباً :
نقاط العضو : 1000 نقطة
تاريخ التسجيل : 06/11/2007
 |  موضوع: أحمد فؤاد نجم - قصيدة سناء الورد الجمعة أبريل 11, 2008 10:23 pm | |
|
إلى أجمل عروس فى العرب الشهيدة سناء
(سناء محيدلى فجرت نفسها فى جنوب لبنان
فى الثمانينات
(شعر أحمد فؤاد نجم )
(1)
محيدلـى
ورق..ورق..ورق..ورق
أفكار ورق
أشعار ورق
شعار ورق
شعارات ورق
ثوار ورق
ثورات ورق
أحلام ورق
حكام ورق
ورق..ورق..ورق..ورق
آه يا وطن على الورق
الحلم فيك
على الورق
خدعنى فيك صوت الورق
وسافرت فيك على الورق
وحلمت بيك بره الورق
بستان ظليل
وقله للعطشان سبيل
وناس ونيــل
ومشربيه وحمام هديل
وبنت حلوه
وواد جميل
هجموا التتار
كلاب ورق
قتلوا الرسوم على الورق
وقالوا حلمك مستحيل
وحتى كان على الورق
وكفنونى بالورق
وضيعونى فى الورق
ورق..ورق..ورق..ورق
مقهور وماشى فى الورق
غرقان غرق
حلمى أنسرق
شايل على قلبى الهوى
من غير دوا
إلا الورق
وفجأتن
لمـع.. بـرق
وقابلتها فوق الورق
مع إنها
مش فى الورق
ولا عمرها كتبت ورق!
(2)
ورق..ورق..ورق..ورق
شفت العروسة على الورق
الشمس ؟ لأ
البـدر ؟ لأ
النجمـة ؟ لأ
البحــر ؟ لأ
الشعـر ؟ لأ
السـحر ؟ لأ
لأ دى الحقيقة المرعبة
قاسيه وبسيطه وطيبه
زيك وزيـى
وزى بنت باحبها
زى الوجود والحب
والناس كلها
كده الربيع
كده الجنى
كده المسائل تنحسب
كده الكلام
كده الغنا
كده القصيدة تنكتب
آه يا سناء الجرح يا بنت الألم
كل الرايات اتنكست
وأنتى العلم
ورق..ورق..ورق..ورق
آه يا وطن غرقان ورق
وعملت أنا مركب ورق
وسندباد ملاح ورق
وسبحت فيك بحر ورق
وصارعت فيك حيتان ورق
وعشقت فيك لحظة غرق
كشفت كنوزك يا وطن
تحت الزباله
والورق
(3)
ورق..ورق..ورق..ورق
يا دى الربيع لاخضر
وسط الخريف طالع
يا نبعة الصحرا
قلبى الحزين والع
أسقينى يا شابه
يمكن تطفينى
وان جفت الميه
ريقك يكفينى
آه يا سناء القهر يا بنت الأنين
يا ضربة الناس الغلابه المظلومين
يام العيون المغرامين
أبصر يمين
يا هل ترى بعد الوطن
بتحبى مين؟
ردى على الأحباب
يا زهرة العناب
إن كان دعاكى الهوى
وإن كان فتحتى الباب
آه يا سناء الرعد يا بنت الحسوم
يا نجمة يا متحيره
بين الغيوم
بأسال وأنا من كسفتى ف نص الهدوم
قلبك صغير يا حبيبتى ع الهموم
وازاى قدرتى تعشقى
وطن فسيح
مطعون جريح
الدنيا طلعت للقمر
وهو متكتف جريح
يا هل ترى قلبك محيط
ولا أنتى يا بنت .. المسيح
آه يا سناء الورد يا بنت الربيع
يا أغلى زهرة أتفتحت هذا الربيع
(4)
ورق..ورق..ورق..ورق
وقعدت ألون فى الورق
عصافير ورق
أشجار ورق
أزهار ورق
أنهار ورق
قصر الكلام جبت الربيع
ونقشت منه ع الورق
طرزت بالياسمين
طرحه وعشر فساتين
ولضمت عقد الفل
لجلك يا ست الكل
وفردت غصن البان
على قدك الفتان
وفتحت الحنه
شباك على الجنة
طليت من الشباك
قابلونى ألف ملاك
رافعين على الأعناق
علم الشهيدة ســناء
| |
|
